la Basse Furlane e il Cormôr

Il Cormôr al è un torent che al nas a Madone di Buie e al cor par 64 km te campagne furlane par rivâ fin al mâr. L’ultin toc, chel al travierse la plane e in particolâr a partî de zone di Cjasteons, al è chel li che si son davueltis lis vicendis peadis ae storie dal grant siopar ledrôs dal 1950, che al veve propit l’obietîf di domandâ il finanziament des oparis di canalizazion fin ae lagune di Maran par evitâ i inagaments des campagnis che a rivavin puntuâi a ogni montane impedint il disvilup de agriculture.

La zone dal Puint dai Rolaz si cjate sul Cormôr intal Comun di Muçane, une vore dongje dal bosc. Propit chi al è stât logât il monument dedicât dal Comun di Muçane ai lavoradôrs che a àn partecipât al siopar al contrari dal 1950. Si trate di une statue di len, une figure di om cun in man une pale realizade cun lamelis sacomadis e soreponudis, opare de artiste locâl Serena Del Piccolo. Il monument al intint ricuardâ la fuarce di anim, il sens di justizie, la resistence e la solidarietât che a àn animât i protagoniscj des Lotis.

Il cors atuâl dal Cormôr e la zone dai Rolaz a son visibii su Google Maps: