lis Lotis dal Cormôr

il teritori 

Intal dopovuere te Basse Furlane a jerin ancjemò tantis lis areis pantanosis di bonificâ e miârs i cjamps che no si podevin doprâ par vie dai frecuents inagaments jù pe stagjon cuant che al ploveve di plui. Lis oparis di bonifiche de zone ator de marine realizadis dilunc dal fassisim cun di fat no jerin stadis puartadis insom e i grancj progjets di trasformazion agrarie elaborâts ta chei agns par valorizâ la agriculture de Basse no jerin mai stâts metûts in vore.

la situazion sociâl

La Basse Furlane e vignive fûr de vuere in cundizions di fuart malstâ sociâl e economic. No esistevin intal teritori, gjavadis la SAICI di Tor di Zuin e cualchi piçule fornâs, industriis o manifaturis buinis di ufrî ocupazion. Lis unichis pussibilitâts di lavôr a jerin duncje concentradis intal cjamp de agriculture. Dongje dai metadiaris e ai piçui proprietaris, a jerin presints, soredut te bande ocidentâl (zonis ator di Tisane e S. Zorç), un grant numar di sotans che, no vint nissun teren ni in afit ni a metadie, par sorevivi a jerin costrets a lavorâ in mût saltuari lis tieris di chei altris e a fâ par periodis curts di timp mistîrs i plui svariâts.

il Plan dal Lavôr de CGIL

Passade la vuere, la Italie e jere un paîs segnât di une fuarte disocupazion, di paiis misaris e di une mancjance gjenerâl di infrastruturis. In chest senari la CGIL e stimave indispensabil un program statâl di oparis publichis in grât di creâ lavôr e al stes timp indotâ il paîs des infrastruturis necessariis par un rilanç economic e sociâl. Cun chest spirt al fo proponût al Guvier il “Piano del Lavoro”, volût a fuart dal so segretari Giuseppe Di Vittorio. Il plan al previodeve intervents di edilizie popolâr, oparis di bonifiche, trasformazions fondiariis, potenziament de produzion energjetiche. Cu la sburte dal “Piano del Lavoro” de CGIL, ancje la confederazion sindicâl furlane e metè adun, te Primevere dal 1950, il “Piano del Lavoro per il Friuli”, che al veve dentri lis fondis par une pussibile rinassite economiche dal Friûl, necessarie par slontanâ il vencul de emigrazion. Par la Basse il plan al previodeve intervents impuartants di bonifiche e di irigazion, tra chestis oparis e jere la canalizazion dal Cormôr, intervent strategjic che al varès podût dâ di lavorâ a tancj disocupâts e valorizâ un grum la produzion agricule. Une volte finît, il canâl al varès traviersât il teritori dai Comuns di Cjasteons, Pucinie, Muçane, Cjarlins e Maran ma a saressin stâts passe cuindis i comuns che a varessin podût zovâsi di cheste opare, in pratiche dute la zone cjapade dentri jenfri il Tiliment e il Cuar. Se il progjet al fos stât puartât indevant cemût che al jere stât ideât in principi, la opare e sarès stade completade in cirche doi agns cul lavôr di 1.400 personis e e varès puartât a bonificâ passe 10.000 etars di teren.

lis assembleis intai paîs

La canalizazion dal Cormôr si presentà daurman tant che la rivendicazion principâl par ducj i disocupâts de zone e, cu la sburte organizative de Cjamare dal Lavôr di Udin e dal Partît Comunist, te seconde metât di Avrîl dal 1950, a forin organizadis riunions e assembleis in cuasi ducj i paîs de Basse. La ativitât di organizazion e di sensibilizazion sul probleme dal lavôr e des bonifichis e otignì une partecipazion popolâr significative e la adesion di personis di diviers orientament politic. Chest cicli di assembleis al finì cuntune grande assemblee ai 18 di Mai a S. Zorç indulà che a parteciparin, dongje di esponents dal mont politic e sindicâl, ancje cetancj sindics dai comuns interessâts. Cheste assemblee e segnà il moment di passaç de fase organizative a chê de lote.

il siopar ledrôs

La mobilitazion e cjapà la forme dal siopar ledrôs: une proteste indulà che i partecipants a lavorin di proprie iniziative e cence paie, par sburtâ cun fuarce la realizazion di une opare di publiche utilitât. Ai 19 di Mai sul cricâ dal dì bracents e disocupâts, organizâts in scuadris daûr dal comun di divignince e munîts di palis e di cariolis, a tacarin a sgjavâ il cjanâl. A Muçane, indulà che al passave il percors dal gnûf cjanâl, a rivarin in biciclete ogni di manifestants di dute la Basse Furlane metintsi al lavôr dilunc dal Cormôr. Ai 24 di Mai la partecipazion popolâr e rivà ai nivei plui alts, cun pontis di doi mil personis rivadis fintremai dal Venit. A Sarvâs (Cjarlins), pôc lontan dal Cormôr, e fo metude sù une mense indulà che si preparave e si deve fûr il mangjâ cjapât sù in ducj i paîs de Basse tant che ufierte de int pes lotis.

la repression

La grandissime partecipazion al siopar e aes assembleis, che e cresseve simpri di plui, e tacave a preocupâ lis autoritâts. Ai 25 di Mai lis fuarcis di polizie, comandadis dal comissari Gallo, a cjâf dal Comissariât di Çarvignan, a scomençarin la repression violente de proteste cun puescj di bloc, inseguiments e cjariis cuintri dai dimostrants, e batudis a Muçane, Cjarlins e Sarvâs. I poliziots a pacarin in maniere indiscriminade no dome i manifestants ma ancje ducj chei che a jerin suspietâts di poiâ lis lotis. Viodût che la repression e lave indevant i dirigjents de Cjamare dal Lavôr di Udin a domandarin al prefet e al cuestôr di meti fin aes violencis. Chest apel al fo sotscrit ancje dal Onorevul Gino Beltrame dal Partît Comunist, che si presentà in plui ocasions di persone sul Cormôr par vuardiâ che no si ripetessin lis violencis.

la solidarietât

Par poiâ lis Lotis e nassè daurman une rêt di solidarietât che e cjapà dentri sindics, plevans, buteghîrs e fornârs di ducj i paîs de Basse, ancje tra chei che no jerin diretementri interessâts de opare. La poie e rivà ancje di inteletuâi, artiscj e scritôrs, che in variis formis a supuartarin la lote, a voltis lant di persone intai lûcs de proteste. Tra di lôr il poete Mario Cerroni, i scultôrs Max Piccini e Dino Basaldella, e i pitôrs Giorgio Celiberti e Giuseppe Zigaina. Chest ultin al piturà i sioperants dal Cormôr in oparis che daspò a deventaran famosis in dut il mont.

lis feminis sul Cormôr

Lis feminis de Basse furlane a àn vût un rûl impuartant tes Lotis, no dome par sostignî i oms e i fîs ma a traviers de partecipazion direte aes mobilitazions. Ai 29 di Mai in place a Muçane si cjatarin in plui di cuatricent, zovinis e mancul zovinis, a manifestâ la poie aes lotis, cjantant cjançons a voltis inventadis di pueste. Dal paîs al partì un vivarôs corteu, che i si zontarin oms e fruts. Rivâts tal Cormôr, a forin propit lis feminis a metisi in rie dilunc dal arzin zigant cuintri de polizie che intant e jere rivade dongje. Al vignì fûr un grant davoi che al fo cuietât de polizie dome doprant i lacrimogjens.

i risultâts des Lotis

Daspò cetancj dîs di lote, i manifestants a otignirin un risultât concret, in gracie ancje de solidarietât simpri plui vivarose di dut il Friûl. Il President dal Consei Alcide De Gasperi, in ocasion de sô visite a Udin dai 4 di Jugn dal ‘50, al anunzià il stanziament des risorsis pai lavôrs dal Cormôr (cirche 100 milions di francs) e, daspò di une serie di contratazions, ai 28 di Jugn a forin cjapâts sù a vore i prins mil operaris, sielzûts in ognidun dai cuindis comuns interessâts de opare. La biele gnove si slargjà daurman par ducj i paîs de Basse provocant dapardut reazions di contentece. La sere stesse in place a Pucinie si cjatarin in trê mil di lôr par fâ fieste pe vitorie otignude. I lavôrs sul Cormôr a tacarin ma la scjarsetât dai finanziaments e la mancjance di un plan organic di intervent statâl te bonifiche a faserin nassi i prins problemis. Dopo nancje un mês i lavôrs a forin sospindûts e buine part dai operaris licenziade: ai 5 di Avost a pierderin il lavôr cirche 800 personis. Plui indenant i finanziaments a rivarin pôc par volte, cence risolvi i grâfs problemis di puaretât e di disocupazion de Basse furlane. La opare ae fin e fo puartade insom doprant pacaris e machinis par sgjavâ e no, cemût che a domandavin i manifestants, dome cu la lavoranzie par garantî plui puescj di lavôr pussibii. Il cjanâl al fo screât ai 20 di Setembar dal 1955, cuant che aromai la maiorance di chei che a vevin partecipât a chestis lotis, par lavorâ e veve scugnût emigrâ tal forest.